safaryani@yahoo.se رەسووڵ سەفەریانی

                                  په‌پووله‌

جه‌سته‌یه‌کی لاواز, روخسارێکی  ره‌نگ په‌ڕیو، جووتێ چاوی به‌قووڵاچوو. له‌سه‌ر قه‌ره‌ویله‌که‌ی راکشا بوو. یان باشتره‌ بڵێم رایانکشانبوو. به‌ ده‌گمه‌ن چاوی ده‌تروکاند. فرمێسکه‌کانی هێڵێکی بچکۆلانه‌یان‌ له‌ ده‌شتی وشک هه‌ڵاتوی گۆنای پڕ له چرچ و‌ قه‌ڵه‌شیدا داخستبوو. له‌ نێو ئه‌و هێڵه‌ سپییه‌دا ده‌زویێک ئاو به‌رده‌وام وه‌ک دوا هه‌ناسه‌ی کانیاوێکی هیوا بڕاو له‌ بارانی به‌هاری، به‌ ئاسته‌م و نه‌خۆش ئاسا بچڕ بچڕ خۆیان تا ژێر چه‌ناگه‌ی ده‌کێشا. له‌گه‌ڵ فرمێسکه‌ بێوچانه‌کانی ئه‌و، مێرده‌که‌یشی هه‌ناسه‌ی هه‌ڵده‌کێشا و چاوه‌کانی پڕ ده‌کرد و به‌ده‌ستماڵه‌که‌ی ده‌ستیشی تاونه‌تاو چاوه‌کانی ئه‌و و خۆی ده‌سڕی.

- بیکه‌ به‌خاتری خودا و مناڵه‌کان که‌م بگری. چه‌ند ساڵه‌ ئه‌مه‌ کاری تۆیه‌. ده‌زانم ناخۆش بوو به‌ڵام خۆ به‌ ئه‌نقه‌ست نه‌مانکرد. هه‌ڵه‌یه‌ک بوو که‌ بۆمان قه‌ره‌بوو ناکرێته‌وه‌. ئه‌وه‌ خۆت وه‌ها له‌ناوبرد. ئایا په‌پوله‌مان بۆ ده‌گه‌ڕێته‌وه‌؟

safaryani@yahoo.se رەسووڵ سەفەریانی

                   باوک

ژیان رێگایه‌که‌ که‌ جار و بار ده‌تباته‌ جیهانێک له‌وێدا هه‌نگوین به‌ زارت تاڵ ده‌بێت و هه‌ست ده‌که‌یت که‌ کات له‌وه‌ستاندایه‌ و باخی ئاواتت ته‌نیا داری بێبه‌ری بڕاننه‌وه‌ی لێده‌ڕوێت. ئه‌مه‌ ئه‌و ده‌یڵێت. ئه‌و که‌ ئه‌م رووداوه‌ی به‌سه‌ر هاتووه‌. ده‌ڵێت ئه‌مڕۆش که‌ پتر له‌ بیست ساڵ به‌سه‌ر ئه‌وشه‌وه‌دا تێده‌په‌ڕێت که‌ بیری لێده‌که‌مه‌وه‌ نه‌خوازانه‌ ده‌چمه‌ ئه‌و هه‌سته‌وه‌. ئێستاش ئه‌و ده‌موچاوانه‌م له‌به‌رچاوه‌. هاوار و گرمه‌ی ئه‌و کابرا خرپنه‌ قه‌ڵه‌وه‌ سه‌رو گوێلاک خڕه‌م له‌ گوێدایه‌. به‌کراسێکی شینی تۆخ و پانتۆڵێکی ره‌شه‌وه‌ له‌ لای سه‌رووی ژووره‌که‌وه‌ به‌ قیافه‌یه‌کی حه‌ق به‌ده‌ستانه‌وه‌ دانیشتبوو. منیش له‌ په‌نای درگاکه‌دا کزۆڵه‌م کردبوو. هه‌رچی ئه‌و ده‌نگی هه‌ڵدێنا بچوركێکی ناخۆش سه‌رتاپێی داده‌گرتم. هاوکات له‌گه‌ڵ قسه‌کانی ئه‌و سه‌ره‌تا هه‌موو نیگاکان به‌ره‌و لای ئه‌و گلۆر ده‌بوونه‌وه‌ و پاشان وه‌ک هه‌ڵماتی سه‌ر لێژی به‌ره‌و چاڵایی به‌ردرگاکه‌ که‌منی لێ بووم ده‌گه‌ڕاننه‌وه‌.

safaryani@yahoo.se رەسووڵ سەفەریانی

نامۆ 

له‌وه‌تی له‌بیرم بێت له‌گه‌ڵمدایه‌. وه‌ک هه‌ناسه‌ ئاوێته‌ی ژیانم بووه‌.  زۆر جار به‌‌ قنج بوونه‌وه‌ له‌ به‌رده‌م پێکه‌نینه‌کانمدا، ده‌بێته‌ هۆی سیس بوونی گوڵی خه‌نده‌م. ده‌مه‌وێت بخه‌وم پێش من سه‌ری له‌سه‌ر سه‌رنگاکه‌م داناوه‌ و وه‌ک گیزه‌ ده‌چێته‌ گوێم و نایه‌ڵێت به‌ ئارامی بخه‌وم. به‌یانیان پێش هه‌ستانم له‌سه‌ر قه‌ره‌ویله‌که‌م دانیشتوه‌ و ده‌بێته‌ یه‌که‌م وێنه‌ی سه‌ر کامێرای چاوم بۆ ده‌سپێکی رۆژێکی نوێ. به‌ڵام کام رۆژی نوێ، ئه‌گه‌ر هه‌موو رۆژێک سیمایه‌ک و ره‌نگ و ده‌نگێک لات دووپات بێته‌وه‌، هه‌موو چرکه‌یه‌ک له‌گه‌ڵ هه‌ناسه‌کان خۆی به‌ ژووری ده‌روندا بکات و هه‌ناسه‌ت قورس بکات، ئیتر ئه‌مه‌ که‌ی‌ کۆن و نوێی ده‌مێنێت. ئه‌گه‌ر تاریک و روونییه‌کانی شه‌و و رۆژ له‌به‌ر چاو نه‌گرین، من به‌ جورئه‌ت ده‌توانم بڵێم هه‌موو ژیانم یه‌ک رۆژ بووه‌. چی بیره‌وه‌ریم هه‌یه‌ هه‌ر له‌گه‌ڵ ئه‌وه‌. چی وێنه‌ له‌ مێشکمدا خزن کراوه‌ له‌ هه‌ر هه‌موویاندا سه‌ری ناوه‌ به‌سه‌رمه‌وه‌. ده‌ڵێی ئاوه‌ڵزادمه‌ و نوساوه‌ به‌ له‌شمه‌وه‌ و ناکرێت لێک بینه‌وه‌. ره‌نگه‌ واش بێت، به‌ بێ یه‌ک بمرین.

safaryani@yahoo.se رەسووڵ سەفەریانی

به‌ره‌ی سوتاو

 به‌رته‌سکی شوێنی ژیان، باڵای ئاواته‌کانی ئینسان کورت ئه‌کاته‌وه‌. ئه‌مه‌ شتێک بوو پاش ساڵیانێک به‌ ئه‌زمون و تاقی کردنه‌وه‌‌ پیگه‌یشتبوو. ئێستاش ‌ که‌ ناوی حه‌مام ده‌به‌ن، سه‌ره‌ڕای تێپه‌ڕ بوونی سالانێکی زۆر به‌سه‌ر ئه‌و رۆژانه‌دا و گۆڕینی هه‌موو ژیانی بۆ ئاقرێکی تر، ده‌که‌وێته‌وه‌ بیری رۆژانی زیندان.

 ته‌نگه‌به‌ری و ته‌ره‌شۆ و شێ و تاریکی حه‌ما‌م وه‌های لێکردبوو که‌ زۆر جار ئێره‌یی ده‌هات به‌‌و هه‌ڤاڵانه‌ی وا له‌ به‌نده‌ گه‌وره‌کان و له‌ نێو قه‌ره‌باڵغییه‌که‌دا بوون. بیری ئازاد بوون  وه‌ک شه‌تڵی ته‌ماته‌ی چاندراو له‌ سه‌ر عه‌رزی بێ ئاو و گه‌رمی هاوینی لێهاتبوو. ئاوێنه‌ی هیوای بۆ‌ بینینی ئه‌ودیوی دیواره‌کان وه‌ها ورد و خاش ببوو که‌ خۆی تیدا بۆ ساخ نه‌ده‌بووه‌وه‌. ئه‌وپه‌ڕی ئاواتی ئێستای جێگایه‌کی وشک و گه‌رم و بیستنی ده‌نگی هاوده‌مێک بوو.

safaryani@yahoo.se رەسووڵ سەفەریانی

هفده‌همین بار بود که‌ لباس عوض کردن درختهای پارک را می دید. همیشه‌ به‌ این میاندیشید که‌ من هم چیزی بیشتر از آنها در حیات ندارم. لباسهایم سالیانه‌ به‌ ندرت بیش از آنها تازه‌ میشوند. من هم چون درختان، تنها آفتاب و هواست که‌ بدون جیره‌بندی و به‌ آسانی بدستم میرسد.